काठमाडौं । नेकपा एमालेका महासचिव शंकर पोखरेलले सभामुख डोल प्रसाद अर्यालको विदेशमा कमाएको भनिएको सम्पत्तिको स्रोतबारे स्पष्ट पार्न माग गरेका छन्। उनले उक्त सम्पत्ति कुन माध्यमबाट नेपाल भित्रिएको हो र त्यसमा कर तिरिएको छ वा छैन भन्ने विषयमा सार्वजनिक जवाफ दिनुपर्ने बताएका छन्।
शुक्रबार काठमाडौंमा आयोजित एक कार्यक्रममा बोल्दै महासचिव पोखरेलले वर्तमान सरकार र आफूलाई ‘नयाँ शक्ति’ भनेर प्रस्तुत गर्ने समूहहरूको सुशासनको नारामाथि नै प्रश्न उठाएका छन्। उनले सुशासनको नाममा आएका नेतृत्वहरूले पारदर्शिताको सिद्धान्तलाई कमजोर बनाएको आरोप लगाए।
“श्रमिकबाट मालिक बन्नु अपराध होइन,” पोखरेलले भने, “तर विदेशमा कमाएको भनिएको सम्पत्ति कुन च्यानलबाट आयो ? त्यसमा राज्यलाई कर तिरिएको छ कि छैन ? यसबारे सभामुखले स्पष्ट जवाफ दिनुपर्छ।”
उनले मन्त्रीहरूले समेत समयमै सम्पत्ति विवरण सार्वजनिक नगरेकोप्रति असन्तुष्टि जनाउँदै यसले सरकारको पारदर्शितामाथि गम्भीर प्रश्न उठाएको बताए। सुशासनको नारा अरूलाई देखाउन मात्र नभई आफैंले पालन गर्नुपर्ने विषय भएको उनको भनाइ थियो।
“सुशासन अरूलाई तर्साउने माध्यम होइन, आफैंले अभ्यास गर्ने कुरा हो,” उनले भने, “एमालेका नेताहरू जुनसुकै अग्निपरीक्षा दिन तयार छन्, के नयाँ भनिनेहरू पनि त्यत्तिकै तयार छन्?”
त्यसैगरी, उनले जेनजी आन्दोलनसम्बन्धी छानबिन गर्न गठित जाँचबुझ आयोगको भूमिकामाथि पनि प्रश्न उठाए। उक्त आयोगलाई ‘प्रतिशोधको हतियार’ बनाइएको आरोप लगाउँदै एमाले अध्यक्ष केपी शर्मा ओलीलाई लक्षित गरेर राजनीतिक दबाब सिर्जना गरिएको उनले दाबी गरे।
पोखरेलले यस्तो गतिविधि जारी रहे एमालेले कडा प्रतिवाद गर्ने चेतावनीसमेत दिएका छन्। उनका अनुसार लोकतान्त्रिक प्रणालीमा पारदर्शिता र जवाफदेहिता सबैका लागि समान रूपमा लागू हुनुपर्छ।
समग्रमा, एमालेले वर्तमान सरकारको सुशासन दाबीमाथि प्रश्न उठाउँदै सार्वजनिक पदमा रहेका व्यक्तिहरूले आफ्नो सम्पत्तिको स्रोतबारे स्पष्ट जानकारी दिनुपर्नेमा जोड दिएको छ।
