काठमाडौँ । नेपाली सूचना प्रविधि (आईटी) क्षेत्र तथा कृत्रिम बौद्धिकता आर्टिफिसियल इन्टेलिजेन्स (एआई) आधारित नवप्रवर्तनलाई अन्तर्राष्ट्रिय स्तरमा स्थापित गर्ने उद्देश्यसहित प्रतिष्ठित ‘एसोसियो डिजिटल एआई अवार्ड २०२६’ का लागि आवेदन खुला गरिएको छ ।
एसियन–ओसियन कम्प्युटिङ उद्योग संगठन (एसोसियो) द्वारा आयोजना हुने यस अवार्डमा नेपालका विभिन्न प्रविधि कम्पनी, नवउद्यम, सरकारी निकाय, शैक्षिक संस्था तथा अनुसन्धान केन्द्रहरूले सहभागिता जनाउन सक्नेछन् ।
यस अवार्डले डिजिटल अर्थतन्त्र र कृत्रिम बौद्धिकता प्रविधिको प्रयोगमार्फत समाज, अर्थतन्त्र तथा विभिन्न क्षेत्रहरूमा योगदान पुर्याइरहेका नवप्रवर्तनकारी समाधानहरूलाई अन्तर्राष्ट्रिय मञ्चमा प्रस्तुत गर्ने अवसर प्रदान गर्नेछ । विशेषगरी नेपाली प्रविधि उत्पादन तथा सेवाहरूलाई विश्व बजारमा प्रतिस्पर्धी बनाउन यो कार्यक्रम महत्वपूर्ण मानिएको छ ।
यस वर्षको अवार्डको मुख्य विषयवस्तु “नेपाली प्रविधि उद्यमी अवसर: आफ्ना उत्पादन र सेवाहरूलाई विश्वव्यापी रूपमा प्रदर्शन गर्नुहोस् र एसोसियो डिजिटल एआई अवार्ड २०२६ प्राप्त गर्नुहोस्” रहेको छ । यस विषयवस्तुमार्फत नेपाली प्रविधि क्षेत्रलाई अन्तर्राष्ट्रिय स्तरमा पहिचान दिलाउने र नवप्रवर्तनलाई प्रोत्साहन गर्ने लक्ष्य राखिएको छ ।
एसोसियोका उपाध्यक्ष नवराज कुँवरले यो अवार्ड नेपाली प्रविधि उद्यमीहरूका लागि आफ्ना उत्पादन र सेवाको गुणस्तर तथा प्रभावलाई अन्तर्राष्ट्रिय रूपमा प्रमाणित गर्ने महत्वपूर्ण अवसर भएको बताएका छन् । उनका अनुसार यो मञ्चले नेपाली डिजिटल नवप्रवर्तनलाई विश्व बजारसँग जोड्न सहयोग पुर्याउनेछ ।
त्यसैगरी क्यान महासंघ (कम्प्युटर एसोसिएसन नेपाल महासंघ) का कार्यवाहक अध्यक्ष चिरञ्जीवी अधिकारीले नेपाली प्रविधि कम्पनी, नवउद्यम तथा सरोकारवालाहरूलाई सक्रिय रूपमा सहभागिता जनाउन आग्रह गरेका छन् । उनले यो अवार्डले नेपाली समाजमा विकसित प्रविधिको प्रभावलाई विश्वसामु उजागर गर्ने र नेपालको डिजिटल क्षमता मजबुत बनाउने अवसर प्रदान गर्ने बताए ।
क्यान महासंघका महासचिव चन्द्रविलास भुर्तेलले आवेदन प्रक्रिया सहज बनाउन महासंघले आवश्यक सहजीकरण गर्ने प्रतिबद्धता जनाएका छन् । उनले यस किसिमका अन्तर्राष्ट्रिय अवार्डले नेपाली प्रविधि क्षेत्रको क्षमता विकास र विश्वव्यापी पहुँच विस्तारमा योगदान पुर्याउने विश्वास व्यक्त गरे ।
यस वर्ष अवार्डलाई थप प्रभावकारी बनाउँदै कृत्रिम बौद्धिकताको प्रयोगमार्फत विभिन्न क्षेत्रमा रूपान्तरण ल्याउने उत्कृष्ट परियोजनाहरूलाई ८ विभिन्न विधामा पुरस्कृत गरिनेछ । ती विधाहरूमा कृत्रिम बौद्धिकता आधारित साइबर सुरक्षा, सार्वजनिक हितका लागि कृत्रिम बौद्धिकता, शिक्षा क्षेत्रमा कृत्रिम बौद्धिकता, स्वास्थ्य सेवामा कृत्रिम बौद्धिकता, स्मार्ट कृषि, वित्तीय सेवामा कृत्रिम बौद्धिकता, कार्यबल तथा भविष्य सीप विकास, तथा उत्पादन उद्योग/आपूर्ति शृङ्खला व्यवस्थापनमा कृत्रिम बौद्धिकता रहेका छन् ।
साइबर सुरक्षा, स्वास्थ्य, शिक्षा, कृषि, वित्तीय सेवा तथा औद्योगिक उत्पादनजस्ता क्षेत्रमा कृत्रिम बौद्धिकताको प्रयोगलाई विशेष रूपमा मूल्याङ्कन गरिनेछ । यसले दिगो विकास लक्ष्य हासिल गर्न योगदान पुर्याउने नवप्रवर्तनलाई प्राथमिकता दिनेछ ।
अवार्डका लागि योग्य आवेदकहरूमा कम्पनीहरू (साना तथा मझौला र ठूला उद्योग), नवउद्यम, सरकारी निकाय, प्राज्ञिक तथा अनुसन्धान संस्था र गैर–नाफामूलक संस्थाहरू समावेश हुनेछन् । प्रस्तावित कृत्रिम बौद्धिकता समाधान कम्तीमा प्रारम्भिक परीक्षण चरणमा कार्यान्वयन भएको हुनुपर्ने र पछिल्ला २४ महिनामा स्पष्ट परिणाम देखाएको हुनुपर्ने शर्त राखिएको छ । एक संस्थाले एक मात्र विधामा आवेदन दिन सक्ने व्यवस्था गरिएको छ ।
आवेदन प्रक्रियाअनुसार इच्छुक संस्थाहरूले ४ देखि ५ पानाको विस्तृत प्रस्ताव पीडीएफ ढाँचामा बुझाउनुपर्नेछ । प्रस्तावमा आवरण पृष्ठ, कार्यकारी सारांश, संस्थागत विवरण, कृत्रिम बौद्धिकता परियोजनाको प्राविधिक पक्ष तथा उत्तरदायी कृत्रिम बौद्धिकता शासनसम्बन्धी विवरण समावेश गर्नुपर्नेछ । आवश्यक ढाँचामा ट्रेबुशे एमएस अक्षर शैली, न्यूनतम १२ बिन्दु आकार र १ इन्च मार्जिन अनिवार्य गरिएको छ ।
कार्यक्रम तालिकाअनुसार आवेदन दिने अन्तिम मिति १५ मे २०२६ तोकिएको छ । त्यसपछि ३० मे २०२६ मा विजेताहरूको घोषणा गरिनेछ भने अवार्ड वितरण समारोह ३० जुलाई २०२६ मा एसोसियो डिजिटल एआई शिखर सम्मेलन २०२६ को अवसरमा आयोजना गरिनेछ ।
यो अवार्डले नेपाली प्रविधि क्षेत्रका नवप्रवर्तनलाई अन्तर्राष्ट्रिय प्रतिस्पर्धामा लैजान, लगानी तथा सहकार्यका अवसर विस्तार गर्न र नेपाललाई डिजिटल तथा कृत्रिम बौद्धिकता नवप्रवर्तनको उदाउँदो केन्द्रका रूपमा स्थापित गर्न महत्वपूर्ण भूमिका खेल्ने अपेक्षा गरिएको छ ।
