काठमाडौं। नेपाल प्रिमियर लिग एनपीएलको तेस्रो संस्करणका लागि साविक विजेता लुम्बिनी लायन्सले नयाँ आधिकारिक जर्सी सार्वजनिक गरेको छ। हाम्रो राज, हाम्रो नेतृत्व’ को अवधारणामा तयार पारिएको जर्सीले टोलीको च्याम्पियन विरासतसँगै लुम्बिनीको ऐतिहासिक गौरव, सांस्कृतिक पहिचान र आध्यात्मिक महत्त्वलाई समेटेको छ।
लुम्बिनी लायन्सले नयाँ जर्सीमार्फत मैदानमा आफ्नो शक्ति र पहिचान प्रस्तुत गर्नुका साथै च्याम्पियनको विरासतलाई निरन्तरता दिने सन्देश दिएको छ। जर्सीको मुख्य अवधारणा ‘राज’ ले लुम्बिनीको ऐतिहासिक गौरव, नेपालको विविधता र नेतृत्वप्रतिको आत्मविश्वासलाई प्रतिबिम्बित गर्छ। टोलीले प्रतिस्पर्धामा सहभागी हुने मात्र नभई आफ्नै पहिचान र आत्मविश्वासका साथ नेतृत्व गर्ने लक्ष्यसमेत यस अवधारणामार्फत प्रस्तुत गरेको छ।नयाँ जर्सीमा समावेश गरिएको सिंहको केश टोलीको शक्ति, जोश, आक्रामकता र शाही गौरवको प्रतीकका रूपमा रहेको छ। सिंहको गर्जन र फहराउने केशबाट प्रेरित डिजाइनले मैदानमा प्रभुत्व जमाउने टोलीको लक्ष्य तथा प्रतिस्पर्धात्मक भावनालाई झल्काउँछ।
त्यस्तै, जर्सीमा समावेश गरिएको मण्डलाले लुम्बिनीको सांस्कृतिक तथा आध्यात्मिक विरासतलाई प्रतिनिधित्व गर्छ। शान्ति, एकता र प्राचीन सभ्यताको प्रतीकका रूपमा प्रस्तुत मण्डलाको निरन्तर घेराले पुस्तौँदेखि हस्तान्तरण हुँदै आएको पहिचान र गौरवलाई संकेत गर्छ।‘हाम्रो राज, हाम्रो शान’ भन्ने भावनालाई केन्द्रमा राखेर तयार पारिएको जर्सीले लुम्बिनीको गौरव र सिंहको शाही आत्मविश्वासलाई एउटै डिजाइनमा जोडेको छ। यसले टोलीको पहिचान, शक्ति र नेतृत्व गर्ने प्रतिबद्धतालाई समेत अभिव्यक्त गरेको छ।
एनपीएलको दोस्रो संस्करणमा उत्कृष्ट प्रदर्शन गर्दै च्याम्पियन बनेको लुम्बिनी लायन्स यसपटक पनि उपाधि रक्षा गर्ने लक्ष्यसहित मैदानमा उत्रने तयारीमा छ। नयाँ जर्सी सार्वजनिक भएसँगै टोलीले तेस्रो संस्करणका लागि आफ्नो तयारी र च्याम्पियनको आत्मविश्वासलाई प्रस्तुत गरेको छ।एनपीएल सिजन–३ मा लुम्बिनी लायन्सले आफ्नो पहिलो खेल २६ अक्टोबर २०२६ मा सुदूरपश्चिम रोयल्ससँग खेल्नेछ। नयाँ जर्सीमा मैदानमा उत्रने लुम्बिनीको लक्ष्य उपाधि रक्षा गर्दै आफ्नो च्याम्पियन विरासतलाई निरन्तरता दिनु हुनेछ।लुम्बिनी लायन्सका लागि नयाँ जर्सी खेल पोशाकमा मात्र सीमित छैन। यो लुम्बिनीको गौरव, सिंहको शक्ति, च्याम्पियनको विरासत र नेतृत्व गर्ने प्रतिबद्धताको प्रतीकका रूपमा प्रस्तुत गरिएको छ। ‘हाम्रो राज, हाम्रो शान’ नारासहित टोली तेस्रो संस्करणमा आफ्नो प्रभाव कायम राख्ने लक्ष्यका साथ अघि बढ्नेछ।
