काठमाडौं । आईसीसी क्रिकेट विश्वकप लिग–२ अन्तर्गत नेपालले खेल्ने दुई महत्वपूर्ण त्रिदेशीय शृंखलाको विस्तृत खेलतालिका सार्वजनिक भएको छ। नेपाल क्रिकेट संघ (क्यान) ले सार्वजनिक गरेको तालिका अनुसार पहिले स्थगित भएको नेपाल, ओमान र यूएईबीचको शृंखला अब अप्रिल २५ देखि मे ५ सम्म सञ्चालन हुनेछ।
यसअघि मध्यपूर्वमा देखिएको तनावका कारण स्थगित गरिएको यो शृंखला अब पुनः तय गरिएको मितिमा हुने भएको हो। शृंखलाका सबै खेल काठमाडौँस्थित त्रिवि क्रिकेट मैदान मा सञ्चालन हुनेछन्, जसले नेपाली समर्थकलाई घरेलु मैदानमै राष्ट्रिय टोलीको खेल हेर्ने अवसर प्रदान गर्नेछ।
तालिका अनुसार नेपालले पहिलो खेल अप्रिल २५ मा यूएईसँग खेल्नेछ। त्यसपछि अप्रिल २९ मा ओमानसँग प्रतिस्पर्धा गर्नेछ। मे १ मा पुनः यूएईसँग खेल्दा मे ५ मा ओमानसँग अन्तिम खेल खेल्ने कार्यक्रम तय भएको छ। यस शृंखलाले नेपाललाई अंकतालिकामा सुधार गर्ने महत्वपूर्ण अवसर प्रदान गर्ने अपेक्षा गरिएको छ।
पहिलो शृंखला सकिएको एक साताभित्रै नेपालले अर्को त्रिदेशीय शृंखला खेल्नेछ। दोस्रो शृंखलामा नेपालसँगै अमेरिका र स्कटल्यान्ड सहभागी हुनेछन्। यो शृंखला मे १२ देखि २२ सम्म सञ्चालन हुनेछ र यसका खेलहरू पनि त्रिवि क्रिकेट मैदानमै हुनेछन्।
यस शृंखलाअन्तर्गत नेपालले पहिलो खेल मे १२ मा स्कटल्यान्डसँग खेल्नेछ। त्यसपछि मे १६ मा अमेरिकासँग प्रतिस्पर्धा गर्नेछ। मे १८ मा फेरि स्कटल्यान्डसँग खेल्दा अन्तिम खेल मे २२ मा अमेरिकासँग हुनेछ। हाल लिग–२ को अंकतालिकामा नेपालको अवस्था चुनौतीपूर्ण छ। नेपालले २० खेलमा १२ अंक जोड्दै सातौँ स्थानमा रहेको छ। यूएई १० अंकसहित पुछारमा छ भने ओमान २७ अंकसहित माथिल्लो स्थानमा रहेको छ। त्यस्तै, अमेरिका ३६ अंकसहित शीर्ष स्थानमा रहँदा स्कटल्यान्ड ३२ अंकसहित दोस्रो स्थानमा रहेको छ।
यी दुवै शृंखला नेपालका लागि अत्यन्त महत्वपूर्ण मानिएका छन्, किनभने यसले लिग–२ मा नेपालको स्थान सुधार गर्ने मात्र होइन, आगामी अन्तर्राष्ट्रिय प्रतियोगिताका लागि टोलीलाई बलियो बनाउने अवसर पनि दिनेछ। घरेलु मैदानको साथ र समर्थकको उत्साहले नेपाललाई उत्कृष्ट प्रदर्शन गर्न थप ऊर्जा दिने अपेक्षा गरिएको छ।
प्रक्षेपण राष्ट्रिय दैनिकबाट साभार।
