जाजरकोट । जाजरकोटको बारेकोट गाउँपालिका–५ स्थित सरस्वती माध्यमिक विद्यालयका विद्यार्थी अत्यधिक चिसोका कारण विद्यालय परिसरको चौरमा घाम ताप्दै परीक्षा दिन बाध्य भएका छन्।
चिसो हावासहित तापक्रम एक्कासी घटेपछि कक्षा कोठाभित्र बस्न कठिन भएपछि विद्यालयले खुला चौरमै परीक्षा सञ्चालन गरेको हो। पछिल्ला केही दिनयता जाजरकोटलगायत कर्णालीका उच्च पहाडी क्षेत्रमा चिसो अत्यधिक बढेको छ।
बिहान र बेलुका बाक्लो कुहिरो र चिसो हावाका कारण विद्यालयका कक्षाकोठा निकै चिसा हुने गरेका छन्। कक्षामा पर्याप्त घाम नलाग्ने र न्यानो बनाउने कुनै साधन नहुँदा विद्यार्थीहरू स्वास्थ्यको जोखिममा पर्ने अवस्था आएपछि विद्यालयले चौरमा परीक्षा दिने व्यवस्था मिलाएको जनाएको छ।
विद्यालय परिसरको खुला चौरमा विद्यार्थीहरू न्यानो कपडा लगाएर घाममा बसेर परीक्षा दिँदै गरेको देखिन्छ। परीक्षा दिन बसेका विद्यार्थीहरूका हात खुट्टा कठ्याङ्ग्रिने अवस्था देखिएपछि कक्षा बाहिर घाममा बस्न पाउँदा केही सहज भएको उनीहरूले बताएका छन्। “कक्षामा बस्दा निकै चिसो हुन्थ्यो, कलम समात्नसमेत गाह्रो हुन्थ्यो,” विद्यार्थीहरुको भनाइ छ, “घाममा बसेपछि अलि सजिलो भएको छ।”
विद्यालयका शिक्षकहरूका अनुसार भौतिक पूर्वाधारको अभाव र चिसो जोगाउने साधन नहुँदा जाडोयाममा पठनपाठन र परीक्षा सञ्चालनमा समस्या हुँदै आएको छ। विशेषगरी ग्रामीण र पहाडी विद्यालयहरूमा न्यानो कक्षा, पर्याप्त भवन र सुविधा नहुँदा विद्यार्थीहरू यस्ता कठिन परिस्थितिमा अध्ययन गर्न बाध्य छन्।
स्थानीय बासिन्दाहरूले पनि चिसो बढ्दा बालबालिकाको स्वास्थ्यमा असर पर्ने भन्दै विद्यालयमा चिसोबाट जोगिने पूर्वाधार आवश्यक रहेको बताएका छन्। “बालबालिकाले जाडोमा पनि सहज रूपमा पढ्न सक्ने वातावरण हुनुपर्छ,” अभिभावकहरुको भनाइ छ, “खुला चौरमा परीक्षा दिनु बाध्यता हो, तर दीर्घकालीन समाधान होइन।”
विद्यार्थीको स्वास्थ्यलाई ध्यानमा राख्दै चौरमा परीक्षा सञ्चालन गरिएको हो। मौसममा सुधार आएपछि पुनः कक्षा कोठामै परीक्षा सञ्चालन गरिने विद्यालयले जनाएको छ। तर स्थानीय तह र सम्बन्धित निकायले जाडोयाममा पनि सुरक्षित रूपमा पठनपाठन र परीक्षा सञ्चालन गर्न सकिने पूर्वाधार निर्माणतर्फ ध्यान दिनुपर्ने सरोकारवालाहरूको भनाइ छ।
जाजरकोटजस्ता दुर्गम जिल्लाका विद्यालयमा भौतिक पूर्वाधार, न्यानोपनको व्यवस्था र शिक्षण वातावरण सुधार नगरेसम्म विद्यार्थीहरूले हरेक वर्ष यस्तै समस्या झेलिरहनुपर्ने अवस्था रहेको भन्दै स्थानीयवासीले ध्यानाकर्षण गराएका छन्।
