गुल्मी । गुल्मी क्षेत्र न. १ का उमेदवार सागर ढकालले निर्वाचनमार्फत जनताबाट अभूतपूर्व समर्थन प्राप्त भएपछि नेतृत्व तहले अब विजय उत्सवभन्दा पनि कामको परिणाम देखाउने समय आएको बताएका छन्।
उनका अनुसार, “जनताले देखाएको विश्वास र मायालाई ठूलो जिम्मेवारीका रूपमा लिँदै आगामी पाँच वर्ष विकास, सुशासन र परिणाममुखी काममा केन्द्रित हुने प्रतिबद्धता व्यक्त गरिएको छ।”
जनताले दिएको समर्थन केवल चुनाव जित्ने अवसर मात्र नभई देश र समाजलाई परिवर्तन गर्ने जिम्मेवारी पनि हो। “अभूतपूर्व माया हामीलाई जिम्मेवारी पूरा गर्न दिनुभएको हो,” उनले भने, “अब विजय र्यालीभन्दा पनि परिणामको र्याली देखाउनुपर्नेछ।”
निर्वाचन परिणाम सार्वजनिक हुने प्रक्रियासँगै कामको सुरुवात समेत गरिसकेको उनले बताएका छन् । गुल्मीमा मतगणना चलिरहेकै बेला वर्षौँदेखि अलपत्र परेको एक सिँचाइ योजनाको निरीक्षण गरेर त्यसको समाधान खोज्ने प्रयास थालिएको उनले जानकारी दिए। उनका अनुसार यस्ता अधुरा र अलपत्र योजनाहरूलाई छिटोभन्दा छिटो पूरा गर्ने लक्ष्य राखिएको छ।
विकास निर्माणका कार्यलाई प्रभावकारी बनाउन स्थानीय समस्या पहिचान गर्दै तत्काल समाधान खोज्ने अभ्यासलाई प्राथमिकता दिइने उनले बताएका छन् । “हिजो मतगणना चलिरहँदा पनि हामी गुल्मीमा एउटा अलपत्र सिँचाइ योजनाको निरीक्षण गरेर त्यसको समाधान निकाल्ने काममा जुटिरहेका थियौँ,” उनले भने, “अब यस्ता धेरै पहलहरू छिट्टै नीतिगत तहबाट नै सुरु हुनेछन्।”
उनका अनुसार आगामी पाँच वर्ष विकासका ठूला योजनाहरू मात्र घोषणा गर्ने नभई ती योजनालाई कार्यान्वयनमा लैजानेतर्फ विशेष ध्यान दिइनेछ। विगतमा धेरै योजना घोषणा भए पनि कार्यान्वयनमा ढिलाइ हुने समस्या देखिएको भन्दै अब त्यसलाई सुधार गर्ने प्रतिबद्धता उनले जनाएका छन्।
“अबको पाँच वर्ष गफभन्दा परिणाम बोल्नेछन्,” उनले भने, “जनताले दिएको विश्वासलाई उपलब्धिमा बदल्नु नै हाम्रो लक्ष्य हो।” उनले देश र समाजको विकासका लागि दिनरात मेहनत गर्ने र देखिने परिवर्तन ल्याउने प्रतिबद्धता व्यक्त गरे। उनका अनुसार अब नेतृत्वको मूल्यांकन पनि भाषण र वाचाभन्दा कामको परिणामका आधारमा हुने समय आएको छ।
उनले राजनीतिक आस्था र दलगत आधारमा भेदभाव नगर्ने स्पष्ट पारे। जुनसुकै राजनीतिक दल वा विचारधारासँग सम्बन्धित भए पनि सबै नागरिकलाई समान व्यवहार गरिने उनले बताए। “जुनसुकै पार्टीको भए पनि कसैलाई कुनै किसिमको असमान व्यवहार हामीबाट हुनेछैन,” उनले भने, “हामी हजुरलाई एक नेपाली सरह माया गर्नेछौँ।”
साथै उनले नागरिकलाई पनि जिम्मेवार भूमिका निर्वाह गर्न आग्रह गरेका छन्। नेताले नागरिकलाई फूलमाला, अबिर र प्रशंसाभन्दा कामका लागि दबाब दिन आग्रह गर्दै विकास र परिवर्तनका लागि सबैको सहयोग आवश्यक हुने बताए। “हामीलाई फूलमाला, अबिर वा गफ होइन, काम दिनुहोला,” उनले भने, “जनताको अपेक्षा र सुझावले नै हामीलाई अझ जिम्मेवार बनाउँछ।”
उनले विशेष गरी गुल्मी, डडेलधुरा लगायत देशभरका नागरिकले देखाएको विश्वास र समर्थनप्रति आभार व्यक्त गरेका छन्। जनताले दिएको माया र भरोसालाई सम्मान गर्दै आगामी दिनमा अझ सक्रिय र परिणाममुखी काम गर्ने प्रतिबद्धता उनले दोहोर्याए। उनका अनुसार अबको पाँच वर्ष जनताको जीवनस्तर सुधार, आधारभूत पूर्वाधार विकास, कृषि, सिँचाइ, शिक्षा र स्वास्थ्य क्षेत्रमा देखिने परिवर्तन ल्याउने लक्ष्यसहित काम गरिनेछ। जनताले अपेक्षा गरेको विकास र समृद्धिको दिशामा ठोस उपलब्धि हासिल गर्न निरन्तर मेहनत गर्ने उनले बताएका छन्।
अन्त्यमा उनले देशलाई सकारात्मक परिवर्तनतर्फ अघि बढाउन सबैको साथ, सहयोग र सुझाव आवश्यक पर्ने उल्लेख गर्दै जनताको विश्वासलाई सफल परिणाममा परिणत गर्ने प्रतिबद्धता व्यक्त गरेका छन्।
