रुपन्देही । बुटवलस्थित सुप्रिम सहकारी ठगी प्रकरणमा पुर्पक्षका लागि थुनामा रहेका नेपाल प्रहरीका पूर्व डीआईजी छविलाल जोशी आइतबार धरौटीमा रिहा भएका छन्। उच्च अदालत र सर्वोच्च अदालतसम्म थुनामा राख्ने आदेश सदर भइसकेपछि पुनः निवेदन दिँदै बिगोबापत जमानत बुझाएर रिहा हुन खोजेका जोशीलाई रुपन्देही जिल्ला अदालतले मागबमोजिम धरौटी राखेर थुनामुक्त गर्ने आदेश दिएको हो।
रुपन्देही जिल्ला अदालतका न्यायाधीश डिल्लीराम शर्मा अर्यालको इजलासले तीन करोड रुपैयाँको बैंक जमानत प्रस्तुत गरेपछि जोशीलाई थुनामुक्त गराउन आदेश दिएको अदालत स्रोतले जनाएको छ। अदालतले एकमुष्ट रकम बैंक मार्फत जमानत बुझाएर मात्र रिहा हुने आदेश दिएअनुसार जोशीले त्यही दिन तीन करोड रुपैयाँको जमानतपत्र पेस गरेका थिए।
जमानत पेस गरेपछि उनलाई दिनकै अन्त्यतिर कारागारबाट रिहा गरिएको हो। यसअघि उच्च अदालत तुलसीपुर, बुटवल इजलासले गत बिहीबार सह–अभियुक्त रवि लामिछानेलाई बिगोबापत जमानत लिने तर थुनामुक्त गराउन सकिने आदेश दिएपछि जोशीको मामिलामा पनि सोही निर्देश लागू हुने स्पष्ट भएको थियो। उच्च अदालतले जोशीले सक्कल जमानतसहित पुनः निवेदन दिए पुनर्विचार गर्नुपर्ने आदेशसमेत गरेको थियो। त्यसका आधारमा दुवै अभियुक्त—लामिछाने र जोशी—ले रकम बुझाएर थुनामुक्त हुन माग गर्दै निवेदन दर्ता गराएका थिए। तर जिल्ला अदालतले सुरुवाती चरणमा ‘यसरी रिहा गर्न नमिल्ने’ आदेश दिएको थियो। त्यसपछि उच्च अदालतले जिल्ला अदालतको आदेश बदर गर्दै विकल्पसहित थुनामुक्त भएर मुद्दा लड्ने बाटो खुलेको हो।
यसअघि लामिछानेलाई उच्च अदालतले एक करोड धरौटीमा रिहा गर्ने आदेश दिए पनि पछि थुनामा पठाउन आदेश सदर भएको थियो। सर्वोच्च अदालतले पनि उनीहरूलाई थुनामै राख्ने आदेश सदर गरेपछि दुवै अभियुक्त थुनामा रहेका थिए। पछिल्लोपटक उच्चले दिएको निर्णयले बिगोबापत धरौटी राखेर रिहा हुने बाटो खुलेपछि जोशीले तीन करोड र लामिछानेले जम्मा तीन करोड ७४ लाख ८४ हजार रुपैयाँ धरौटी बुझाएका हुन्।
लामिछानेले बुझाएको धरौटीमध्ये एक करोड रुपैयाँ पहिले नै बुझाइसकेका थिए। बाँकी रकम यसै प्रक्रियाअनुसार भुक्तानी गरेपछि दुवैलाई थुनामुक्त हुने प्रक्रिया अघि बढेको हो। अदालतका आदेशपछि दुवैले अब थुनाबाहिरै रहेर मुद्दा बहस सामना गर्नेछन्। बुटवलको सुप्रिम सहकारी प्रकरण लामो समयदेखि चर्चामा रहेको छ। ठगीको बिगो अत्यधिक भएकाले सहकारी सञ्चालक र प्रभावशाली व्यक्तिहरूको संलग्नता विषयले व्यापक बहस र विवाद सिर्जना गरेको छ। अब मुद्दा अदालतमा अगाडि बढ्दै जाँदा थुनाबाहिर रहेर दुवै अभियुक्तले कानुनी लडाइँ लड्नेछन् ।
प्रक्षेपण राष्ट्रिय दैनिकदेखि साभार ।
