काठमाडौँ । डा. सीके राउत नेतृत्वको जनमत पार्टीले देशमा वैकल्पिक राजनीतिक शक्ति निर्माण गर्ने लक्ष्यसहित ‘राष्ट्रिय वैकल्पिक मोर्चा’ गठनको प्रक्रिया अघि बढाएको छ । सोही उद्देश्यअनुसार पार्टीले विभिन्न समान सोच भएका राजनीतिक दलहरूसँग संवाद र सहकार्यका लागि औपचारिक पहल सुरु गरेको हो ।
यस पहललाई व्यवस्थित र परिणाममुखी बनाउन जनमतले वार्ता कार्यदलसमेत गठन गरेको छ । जनमत पार्टीले श्रम संस्कृति पार्टी, उज्यालो नेपाल पार्टी र प्रगतिशील लोकतान्त्रिक पार्टी (प्रलोपा) सँग मोर्चाबन्दी तथा सम्भावित राजनीतिक सहकार्यका लागि वार्ता अघि बढाउने निर्णय गरेको छ । यी दलहरूलाई वैकल्पिक राजनीतिक धारका रूपमा लिँदै जनमतले साझा एजेन्डा निर्माण र दीर्घकालीन सहकार्यको सम्भावना खोज्न खोजेको देखिन्छ ।
वार्ता प्रक्रियालाई प्रभावकारी बनाउन नरेन्द्र चौधरीको संयोजकत्वमा तीन सदस्यीय कार्यदल गठन गरिएको जनमतका केन्द्रीय सचिवालय प्रमुख राजेशकुमार मण्डलले जानकारी दिएका छन् । कार्यदलमा डा. जयकान्त राउत र प्रमोदकुमार गुप्ता सदस्यका रूपमा रहेका छन् । यी नेताहरूलाई सम्बन्धित दलहरूसँग प्रत्यक्ष संवाद गर्ने, साझा मुद्दा पहिचान गर्ने तथा सम्भावित सहकार्यका आधार तयार गर्ने जिम्मेवारी दिइएको छ । जनमतका अनुसार कार्यदलले निकट भविष्यमा सम्बन्धित दलहरूसँग औपचारिक तथा अनौपचारिक छलफल सुरु गर्नेछ । वार्ताको क्रममा राजनीतिक एजेन्डा, संगठनात्मक संरचना, नेतृत्वको स्वरूप तथा आगामी निर्वाचनमा सहकार्यको ढाँचाबारे समेत छलफल हुने अपेक्षा गरिएको छ । यसले केवल मोर्चाबन्दी मात्र नभई सम्भावित एकता वा दीर्घकालीन गठबन्धनतर्फ समेत मार्ग प्रशस्त गर्न सक्ने अनुमान गरिएको छ ।
‘राष्ट्रिय वैकल्पिक मोर्चा’ को अवधारणा पछिल्ला वर्षहरूमा स्थापित दलहरूप्रति बढ्दो असन्तुष्टिका बीच नयाँ विकल्पको खोजीका रूपमा आएको देखिन्छ । जनमत पार्टीले आफूलाई परिवर्तनको संवाहकका रूपमा प्रस्तुत गर्दै अन्य साना तथा उदाउँदै गरेका दलहरूसँग मिलेर बलियो वैकल्पिक शक्ति निर्माण गर्न खोजिरहेको छ ।
राजनीतिक विश्लेषकहरूका अनुसार यस्तो मोर्चा सफल हुनका लागि केवल घोषणामा सीमित नभई स्पष्ट नीति, साझा दृष्टिकोण र नेतृत्वबीच विश्वासको वातावरण आवश्यक हुन्छ। विगतमा पनि विभिन्न वैकल्पिक शक्तिहरूबीच सहकार्यको प्रयास भए पनि दीर्घकालीन रूपमा टिक्न नसकेको उदाहरणहरू छन् । त्यसैले यसपटकको प्रयास कत्तिको प्रभावकारी हुन्छ भन्ने प्रश्न पनि उस्तै रूपमा उठिरहेको छ ।
यद्यपि जनमत पार्टीको यो कदमले देशको राजनीतिक परिदृश्यमा नयाँ बहस सुरु गरेको छ । यदि विभिन्न वैकल्पिक शक्तिहरूबीच सहमति जुट्न सकेमा यसले आगामी चुनावी राजनीतिमा प्रभाव पार्न सक्ने देखिन्छ ।
विशेषगरी युवापुस्तामा बढ्दो राजनीतिक चेतना र परिवर्तनको चाहनालाई सम्बोधन गर्न सक्ने बलियो प्लेटफर्म बन्ने सम्भावना पनि यसले बोकेको छ । अब कार्यदलले गर्ने संवाद र त्यसबाट निस्कने निष्कर्षले ‘राष्ट्रिय वैकल्पिक मोर्चा’ को भविष्य तय गर्नेछ । सफल सहकार्यको आधार तयार भएमा यो पहल नेपाली राजनीतिमा नयाँ ध्रुवीकरणको सुरुआत बन्न सक्नेछ ।
प्रक्षेपण राष्ट्रिय दैनिकबाट साभार ।
