काठमाडौं । फिफा विश्वकप २०२६ अन्तर्गत विभिन्न समूह चरणका खेलहरूमा युरोप, अफ्रिका र दक्षिण अमेरिकाका ठूला तथा साना टोलीहरूले मिश्रित प्रदर्शन गरेका छन् ।
स्पेनले साउदी अरेबियामाथि फराकिलो जित निकाल्दै नकआउट चरण नजिक पुगेको छ भने बेल्जियम–इरान भिडन्त गोलरहित बराबरीमा सकिएको छ । त्यस्तै केप भर्डेले दुई पटकका विश्वविजेता उरुग्वेसँग बराबरी खेल्दै सनसनी मच्चाएको छ भने इजिप्टले न्युजिल्यान्डमाथि पुनरागमन जित दर्ता गर्दै इतिहास रचेको छ ।
एटलान्टा स्टेडियममा भएको समूह ‘एच’को खेलमा स्पेनले साउदी अरेबियालाई ४–० ले पराजित गर्दै प्रतियोगितामा आफ्नो पहिलो जित दर्ता गरेको छ । खेलको सुरुआतदेखि नै आक्रमक देखिएको स्पेनले १०औँ मिनेटमै अग्रता लिएको थियो । मिकेल ओयार्जाबालको पासमा युवा स्टार लामिन यामालले सहज फिनिस गर्दै टोलीलाई अगाडि बढाए । यस गोलसँगै यामाल विश्वकप इतिहासमा गोल गर्ने सबैभन्दा कान्छा खेलाडीमध्ये एक बने ।
स्पेनले त्यसपछि खेलमा पूर्ण नियन्त्रण जमायो। २१औँ मिनेटमा ओयार्जाबालले पहिलो गोल गर्दै अग्रता दोब्बर बनाए । मात्र तीन मिनेटपछि उनले व्यक्तिगत दोस्रो गोल गर्दै स्पेनलाई ३–० को बलियो स्थितिमा पुर्याए । पहिलो हाफमा नै स्पेनले खेल आफ्नो पक्षमा पारिसकेको थियो। ओयार्जाबाल ह्याट्रिक नजिक पुगे पनि उनको एक प्रहार क्रसबारमा लागेको थियो ।
दोस्रो हाफमा साउदी अरेबियाले खेल सुधार्ने प्रयास गरे पनि स्पेनको दबाब रोक्न सकेन। ४८औँ मिनेटमा मार्क कुकुरेलाको प्रहारपछि साउदी डिफेन्सको कमजोरीका कारण हसन अल ताम्बाक्तीबाट आत्मघाती गोल भयो र स्पेन ४–० ले अघि बढ्यो । बाँकी समयमा दुवै टोलीले अवसर सिर्जना गरे पनि थप गोल हुन सकेन। यस जितसँगै स्पेन समूह ‘एच’ मा ४ अंकसहित शीर्ष स्थानमा उक्लिएको छ र नकआउट चरण पुग्ने सम्भावना बलियो बनाएको छ ।
उही समूहको अर्को खेलमा दुई पटकका विश्वविजेता उरुग्वे नवप्रवेशी केप भर्डेसँग २–२ को बराबरीमा रोकिएको छ । मियामीमा भएको खेलमा केप भर्डेले उत्कृष्ट प्रदर्शन गर्दै पहिलो हाफमै अग्रता लिएको थियो। २१औँ मिनेटमा केभिन पिनाको सानदार फ्रिकिक गोलले केप भर्डेले इतिहासमै पहिलो विश्वकप गोल दर्ता गर्यो ।
तर उरुग्वेले चाँडै प्रतिक्रिया दियो। ४४औँ मिनेटमा म्याक्सी अराउजोले बराबरी गोल गरे भने पहिलो हाफको इन्जुरी समयमा अगुस्टिन कानोबियोले गोल गर्दै उरुग्वेलाई २–१ को अग्रता दिलाए। दोस्रो हाफमा पनि खेल रोचक रह्यो । ६१औँ मिनेटमा हेलियो भारेलाले केप भर्डेको लागि बराबरी गोल गरेपछि खेल २–२ मा समाप्त भयो। यस नतिजासँगै समूह ‘एच’ मा स्पेन ४ अंकसहित शीर्ष स्थानमा छ भने उरुग्वे र केप भर्डे दुवैको २ अंक छ । साउदी अरेबियाले १ अंक जोडेको छ ।
यस्तै समूह ‘जी’ अन्तर्गत बेल्जियम र इरानबीचको खेल गोलरहित बराबरीमा सकिएको छ। लस एन्जलसमा भएको खेलमा बेल्जियमले बल पोजेसन र आक्रमणमा प्रभुत्व जमाए पनि गोल गर्न सकेन। बेल्जियमले खेलभर २० भन्दा बढी प्रहार गरे पनि इरानका गोलरक्षक अलिरेजा बेरानभान्दले उत्कृष्ट बचाउ गर्दै टोलीलाई जोगाए ।
खेलको ६६औँ मिनेटमा बेल्जियमका डिफेन्डर नाथन एङ्गोए रातो कार्ड पाएपछि टोली १० खेलाडीमा सीमित भयो। त्यसपछि पनि बेल्जियमले गोल गर्ने प्रयास जारी राख्यो तर सफलता पाएन। इरानले पनि अवसर पाए पनि गोल गर्न सकेन । यस नतिजासँगै बेल्जियम र इरान दुवैको २ खेलबाट २ अंक भएको छ र समूहको प्रतिस्पर्धा अझै रोचक बनेको छ ।
यता समूह ‘जी’मै इजिप्टले न्युजिल्यान्डमाथि ३–१ को पुनरागमन जित निकाल्दै ऐतिहासिक उपलब्धि हासिल गरेको छ। खेलको १५औँ मिनेटमा न्युजिल्यान्डले अग्रता लिएको थियो तर दोस्रो हाफमा इजिप्ट पूर्ण रूपमा खेलमा फर्कियो। ५८औँ मिनेटमा मोस्तफा जिकोले हेडरमार्फत बराबरी गोल गरे । त्यसपछि कप्तान मोहम्मद सलाहले उत्कृष्ट फिनिस गर्दै इजिप्टलाई २–१ को अग्रता दिलाए ।
८२औँ मिनेटमा सलाहको कर्नरमा ट्रेजेगुएले हेडरमार्फत गोल थपेपछि इजिप्टले ३–१ को जित पक्का गर्यो । यो जित इजिप्टका लागि ऐतिहासिक रह्यो किनभने टोलीले विश्वकपमा लामो समयपछि पहिलो जित दर्ता गर्दै नकआउट चरण प्रवेशको सम्भावना बलियो बनाएको छ। समूह ‘जी’ मा इजिप्ट शीर्ष स्थानमा उक्लिएको छ भने अन्य टोलीहरू अन्तिम खेलमा निर्णायक भिडन्तको तयारीमा छन् ।
फिफा विश्वकप २०२६ को समूह चरणका खेलहरूले प्रतियोगिता प्रतिस्पर्धात्मक बनाएका छन्। एकातर्फ स्पेन जस्ता ठूला टोलीले आफ्नो शक्ति प्रदर्शन गरिरहेका छन् भने अर्कोतर्फ केप भर्डे जस्ता नवप्रवेशी टोलीले विश्व फुटबलमा नयाँ इतिहास लेखिरहेका छन् । बेल्जियम जस्तो बलियो टोली दबाबमा देखिएको छ भने इजिप्टले पुनरागमनसँगै आफ्नो अभियानलाई जीवन्त राखेको छ । अब बाँकी खेलहरूले नकआउट चरणको समीकरण अझ स्पष्ट पार्नेछन् ।
प्रक्षेपण राष्ट्रिय दैनिकबाट साभार।
