काठमाडौं । नेपाल आयल निगमले पेट्रोलियम पदार्थको मूल्य प्रतिलिटर २० रुपैयाँले घटाएपछि काठमाडौं उपत्यकाका अधिकांश निजी पेट्रोल पम्प बुधबार बन्द भएका छन् ।
नयाँ मूल्य लागू भएसँगै पुरानो मौज्दात कम मूल्यमा बिक्री गर्दा आर्थिक घाटा व्यहोर्नुपर्ने भन्दै धेरै निजी पम्प सञ्चालकले इन्धन बिक्री अस्थायी रूपमा रोकेका हुन् ।
निगमले मंगलबार राति १२ बजेदेखि लागू हुने गरी पेट्रोलियम पदार्थको नयाँ खुद्रा मूल्य निर्धारण गरेको थियो । नयाँ मूल्यसूचीअनुसार पेट्रोल, डिजेल र मट्टितेलको मूल्यमा उल्लेखनीय कटौती गरिएको छ । मूल्य समायोजनपछि पुरानो मूल्यमा खरिद गरिएको इन्धन नयाँ दरमा बिक्री गर्नुपर्दा प्रतिलिटर घाटा हुने भएकाले धेरै निजी पम्पले बिक्री नगर्ने निर्णय गरेको जनाएका छन् ।
बुधबार बिहानैदेखि काठमाडौं, ललितपुर र भक्तपुरका विभिन्न स्थानमा रहेका निजी पेट्रोल पम्प बन्द देखिएका थिए । कतिपय पम्पमा ‘प्राविधिक कारणले सेवा बन्द छ’ भन्ने सूचना टाँसिएको थियो भने केही पम्प पूर्ण रूपमा बन्द रहेका थिए । यसका कारण इन्धन भर्न पुगेका सवारी चालक र सर्वसाधारणले सेवा नपाई अन्य पम्पको खोजी गर्नुपरेको थियो । सरकारी स्वामित्वका तथा केही निजी पेट्रोल पम्प भने नियमित रूपमा सञ्चालनमा रहेका कारण ती स्थानमा सवारीसाधनको चाप बढेको देखिएको छ। धेरै ठाउँमा लामो लाइन लागेपछि सेवाग्राहीले पालो कुर्नुपर्ने अवस्था समेत सिर्जना भएको थियो ।
पेट्रोल पम्प सञ्चालकहरूले मूल्य घट्दा पुरानो मौज्दातमा हुने घाटाको उचित व्यवस्थापन गर्नुपर्ने माग गर्दै आएका छन् । उनीहरूका अनुसार अन्तर्राष्ट्रिय बजारको मूल्यअनुसार निगमले बारम्बार मूल्य समायोजन गर्दा मौज्दातमा रहेको इन्धनबाट ठूलो आर्थिक नोक्सानी व्यहोर्नुपर्ने अवस्था दोहोरिने गरेको छ ।
यता, उपभोक्ताले भने मूल्य घटेपछि सहज रूपमा इन्धन उपलब्ध गराउनु सम्बन्धित निकायको दायित्व भएको बताएका छन् । मूल्य घटेको समयमा पम्प बन्द हुँदा अनावश्यक सास्ती बेहोर्नुपरेको उनीहरूको गुनासो छ । यस विषयमा नेपाल आयल निगमले निजी पेट्रोल पम्प बन्द भएको अवस्थाबारे आवश्यक जानकारी संकलन भइरहेको जनाएको छ । निगमले इन्धनको आपूर्तिमा कुनै समस्या नरहेको र उपभोक्तालाई नियमित रूपमा सेवा उपलब्ध गराउन सम्बन्धित पक्षसँग आवश्यक समन्वय गरिने जनाएको छ ।
