काठमाडौं । भारत सरकारले नेपालका प्रधानमन्त्री वालेन्द्र शाह (बालेन) लाई भारत भ्रमणका लागि औपचारिक निमन्त्रणा पठाएको जनाएको छ ।
भारतको विदेश मन्त्रालयले मंगलबार नयाँदिल्लीमा आयोजित नियमित पत्रकार सम्मेलनमार्फत उक्त जानकारी सार्वजनिक गरेको हो ।भारतको विदेश मन्त्रालयका प्रवक्ता रणधीर जयसवालले पत्रकार सम्मेलनमा नेपालका प्रधानमन्त्री वालेन्द्र शाहलाई भारत भ्रमणको निमन्त्रणा पठाइएको विषयमा सञ्चारकर्मीले राखेको प्रश्नको जवाफ दिँदै निमन्त्रणा पठाइएको पुष्टि गरेका हुन् । पत्रकारले “नेपालका प्रधानमन्त्री वालेन्द्र शाहलाई भारत भ्रमणको निमन्त्रणा पठाइएको हो ?” भन्ने प्रश्न गरेपछि प्रवक्ता जयसवालले छोटो जवाफ दिँदै भने, “हो, नेपालका प्रधानमन्त्रीलाई भारत भ्रमणको निमन्त्रणा पठाइएको छ ।”
यद्यपि भारतले भ्रमणको सम्भावित मिति, एजेन्डा वा भ्रमण कहिले हुने भन्नेबारे भने कुनै थप विवरण सार्वजनिक गरेको छैन । प्रधानमन्त्री शाहले निमन्त्रणा स्वीकार गरिसकेका छन् वा छैनन् भन्ने विषयमा पनि भारतीय पक्षले केही खुलाएको छैन ।
भारत र नेपालबीच उच्चस्तरीय राजनीतिक भ्रमणलाई दुई देशबीचको कूटनीतिक सम्बन्ध सुदृढ गर्ने महत्वपूर्ण माध्यमका रूपमा हेरिने गरिन्छ । पछिल्ला वर्षहरूमा ऊर्जा, पूर्वाधार, व्यापार, सीमा व्यवस्थापन, जलस्रोत, कनेक्टिभिटी तथा पारवहनलगायतका विषय दुई देशबीचको सहकार्यका प्रमुख एजेन्डा बन्दै आएका छन् । यदि प्रधानमन्त्री शाहको भारत भ्रमण तय भएमा द्विपक्षीय सम्बन्धका विविध आयाम, आर्थिक सहकार्य विस्तार, सीमा क्षेत्रमा रहेका साझा चासोका विषय तथा क्षेत्रीय सहकार्यबारे उच्चस्तरीय छलफल हुने अपेक्षा गरिएको छ । साथै, नेपाल–भारत सम्बन्धलाई थप सुदृढ बनाउने विषयमा पनि दुवै पक्षबीच विचार आदानप्रदान हुन सक्ने अनुमान गरिएको छ ।
नेपाल र भारतबीच परम्परागत रूपमा घनिष्ठ राजनीतिक, आर्थिक, सांस्कृतिक तथा जनस्तरको सम्बन्ध रहँदै आएको छ । दुई देशबीच उच्च तहका भ्रमणले द्विपक्षीय सम्बन्धलाई नयाँ गति दिने विश्वास व्यक्त गरिँदै आएको छ । प्रधानमन्त्री वालेन्द्र शाह नेतृत्वको सरकारले छिमेकी मुलुकहरूसँगको सम्बन्धलाई सन्तुलित र व्यवहारिक ढंगले अघि बढाउने प्रतिबद्धता व्यक्त गर्दै आएको छ । यस्तो अवस्थामा भारतको औपचारिक निमन्त्रणालाई कूटनीतिक दृष्टिले अर्थपूर्ण रूपमा हेरिएको छ । अब दुवै देशका कूटनीतिक संयन्त्रमार्फत भ्रमणको मिति, कार्यक्रम तथा एजेन्डा तय हुने अपेक्षा गरिएको छ ।
भ्रमणको अन्तिम तालिका सार्वजनिक भएपछि प्रधानमन्त्री शाहले भारतीय प्रधानमन्त्री नरेन्द्र मोदीसहित उच्च भारतीय नेतृत्वसँग भेटवार्ता गर्ने सम्भावना रहनेछ । भारत नेपालको प्रमुख विकास साझेदार तथा सबैभन्दा ठूलो व्यापारिक साझेदारमध्ये एक हो । ऊर्जा व्यापार, सीमापार प्रसारण लाइन, रेल तथा सडक सञ्जाल विस्तार, पेट्रोलियम आपूर्ति, कृषि, शिक्षा, स्वास्थ्य र लगानीका क्षेत्रमा दुवै देशबीच सहकार्य निरन्तर विस्तार हुँदै आएको छ । त्यसैले प्रधानमन्त्री शाहको सम्भावित भारत भ्रमणलाई दुई देशबीचको बहुआयामिक सम्बन्धलाई थप उचाइमा पुर्याउने अवसरका रूपमा समेत हेरिएको छ ।
प्रक्षेपण राष्ट्रिय दैनिकबाट साभार ।
