काठमाडौं । नेपाल–इटाली चेम्बर अफ कमर्स एण्ड इन्डस्ट्रिजले काठमाडौँमा आफ्नो १२औँ वार्षिक साधारण सभा सफलतापूर्वक सम्पन्न गरेको छ ।
यस सभाको माध्यमबाट नेपाल र इटालीबीच द्विपक्षीय व्यापार, लगानी, पर्यटन तथा व्यावसायिक सहयोग सुदृढ गर्ने आफ्नो प्रतिबद्धता पुनः पुष्टि गरिएको छ । उक्त कार्यक्रममा माननीय संरक्षक राजेशकाजी श्रेष्ठ मुख्य अतिथिको रूपमा उपस्थित थिए।
यस वार्षिक साधारण सभाले आगामी तीन वर्षका लागि सञ्जय अग्रवाललाई पुनः अध्यक्षमा निर्वाचित गरेको छ । उनको पुनर्गठनले नेतृत्व र चेम्बरप्रतिको दृष्टिकोणमा सदस्यहरूको निरन्तर विश्वासलाई प्रतिबिम्बित गरेको छ ।
सभालाई सम्बोधन गर्दै अध्यक्ष अग्रवालले नेपालको विकास कार्य र सांस्कृतिक सम्पदा संरक्षणमा इटालीले निरन्तर पुर्याउँदै आएको सहयोगको महत्त्वबारे चर्चा गरे।
आगामी कार्यकालका लागि आफ्ना रणनीतिक प्राथमिकताहरू प्रस्तुत गर्दै अध्यक्ष अग्रवालले नेपाली र इटालियन उद्यमीहरूबीच व्यवसाय–देखि–व्यवसाय (B2B) सहयोगलाई थप प्रभावकारी बनाउने बताए।
उनले लगानी तथा नीतिगत संवादलाई सक्रिय रूपमा सहजीकरण गर्ने, पर्यटन र सांस्कृतिक सहयोग विस्तार गर्ने, र सदस्यहरूलाई ठोस मूल्य प्रदान गर्ने विश्वसनीय र कार्यमुखी चेम्बरको रूपमा NICCI को भूमिकालाई अझ सुदृढ गर्ने लक्ष्य राखेका छन्।
कार्यक्रमका अवसरमा विशेष योगदान पुर्याउने व्यक्तित्वहरूलाई सम्मान समेत गरिएको थियो । जसअन्तर्गत विनोद सग्तानीलाई ‘Member of the Year 2025’ र श्री कल्याण सिलवाललाई ‘NICCI CSR Community 2025 Award’ प्रदान गरियो ।
नेपाल र इटालीबीच व्यापार–व्यवसाय, लगानी सहजीकरण र पर्यटन क्षेत्रमा नयाँ आयाम थप्ने उद्देश्यका साथ कार्यक्रम सम्पन्न भएको छ।
