काठमाडौं । गम्भीर मस्तिष्क चोट (ट्रमाटिक ब्रेन इन्जुरी) भोगेका बेलायतीहरूको साहस, संघर्ष र पुनःउत्थानको कथा बोकेको डकुमेन्ट्री फिल्म ‘द एभरेस्ट ड्रिम’ आइतबार नेपाल अन्तर्राष्ट्रिय चलचित्र महोत्सव (निफ) मा प्रिमियर गरिएको छ।
प्रिमियर कार्यक्रममा उपस्थित नेपालका लागि बेलायती राजदूत रब फेन फिल्म हेर्दा भावुक बनेका थिए। उनले यसलाई “अत्यन्तै प्रेरणादायी कथा” भन्दै प्रशंसा गरे। स्कटल्यान्डका ब्रेन इन्जुरीबाट बाँचेकाहरूले सगरमाथा बेस क्याम्पसम्म पुग्ने लक्ष्यसहित गरेको असाधारण यात्रालाई समेटिएको यस फिल्मको निर्देशन पत्रकार तथा फिल्म निर्देशक गणेश पाण्डेले गरेका हुन्। करिब डेढ वर्षको मेहनतपछि तयार भएको फिल्मले गम्भीर दुर्घटनापछि जीवनसँग संघर्ष गरिरहेका व्यक्तिहरूले आशा र आत्मविश्वासका साथ नयाँ सपना पछ्याएको कथा प्रस्तुत गर्छ।
डाक्टरहरूले सामान्य जीवनमा फर्किन कठिन हुने बताए पनि उनीहरूले हार नमानी नेपाल आएर एभरेस्ट बेस क्याम्पसम्मको चुनौतीपूर्ण यात्रा पूरा गरेका थिए। फिल्ममा स्कटल्यान्डबाट सुरु भएको यात्रा, काठमाडौं आगमन र खुम्बु क्षेत्र हुँदै बेस क्याम्पतर्फको भावनात्मक पदयात्रा चित्रण गरिएको छ। उचाइ, थकान र स्वास्थ्य समस्याबीच पनि उनीहरू एकअर्काको साथ र शेर्पा गाइडहरूको सहयोगमा अघि बढ्ने प्रयासले कथालाई अझ प्रभावशाली बनाएको छ।
यात्राका क्रममा केही कठिन क्षणहरू पनि समेटिएका छन्—एक सदस्य केही समय समूहबाट हराउने घटना तथा अर्का सदस्य स्वास्थ्य समस्याका कारण बेस क्याम्प पुग्नुअघि नै रोकिनुपरेको अवस्था। निर्देशक पाण्डेका अनुसार, “यो फिल्मले ब्रेन इन्जुरीपछि पनि जीवनमा नयाँ सपना देख्न सकिन्छ भन्ने सन्देश दिन्छ।” द लिटिल शेर्पा फाउण्डेशनका जेम्स ल्याम्बको नेतृत्वमा पाँच जना बिरामी र परिवारसहित सात जनाको टोलीले उक्त यात्रा पूरा गरेका थिए।
यसैगरी, युनिभर्सिटी अफ साउदर्न क्यालिफोर्नियाकी प्राध्यापक जेनिफर कूलले पनि डकुमेन्ट्रीबाट आफू निकै प्रभावित भएको बताएकी छन्। फिल्म निर्माणका क्रममा निर्देशक पाण्डे स्वयंले पनि चुनौती सामना गरेका थिए। बेस क्याम्प पुग्नै लाग्दा अक्सिजनको कमी भएपछि उनलाई हेलिकप्टरमार्फत फर्किनु परेको थियो।
निर्देशक पाण्डेका अघिल्ला डकुमेन्ट्रीहरू पनि अन्तर्राष्ट्रिय स्तरमा सफल भइसकेका छन्। भूकम्पसम्बन्धी “भाग्यले बाँचेकाहरू” ले १७ भन्दा बढी अन्तर्राष्ट्रिय पुरस्कार जितेको थियो भने बहुपति प्रथामा आधारित “को–हजबेण्ड” ले पनि एक दर्जनभन्दा बढी अवार्ड जित्दै ४० भन्दा बढी अन्तर्राष्ट्रिय फिल्म महोत्सवमा प्रदर्शन भएको थियो । फिल्ममा एसोसिएट निर्मात्री शारदा गैरे, क्यामेरापर्सन सुरेश श्रेष्ठ र निरज पन्थी, सम्पादक ईश्वर कोइराला, संगीतकार जुगल डंगोल र सन्दीप सरदार तथा न्यारेटर कौशल घिमिरेको योगदान रहेको छ।
प्रिमियरसँगै ‘द एभरेस्ट ड्रिम’ अब विभिन्न अन्तर्राष्ट्रिय चलचित्र महोत्सवहरूमा प्रदर्शन गरिने निर्देशक पाण्डेले जानकारी दिएका छन्।
प्रक्षेपण राष्ट्रिय दैनिकबाट साभार ।
