काठमाडौं । विश्वकप तयारीअन्तर्गत भएको मैत्रीपूर्ण खेलमा अर्जेन्टिनाले होन्डुरसलाई २–० ले पराजित गर्दै आफ्नो उत्कृष्ट लय कायम राखेको छ ।
अमेरिकाको टेक्सासस्थित कलेज स्टेसनमा भएको खेलमा अर्जेन्टिनाले सुरुदेखि नै बलमा पूर्ण नियन्त्रण राखेको थियो। पहिलो हाफ सामान्य रूपमा सुस्त भए पनि ३७ औँ मिनेटमा खेलमा उत्साह थपिएको थियो ।
त्यही समयमा निकोलस टाग्लियाफिको पेनाल्टी बक्सभित्र क्रिस्टोफर मेलेन्डेजबाट फउल भएपछि अर्जेन्टिनाले पेनाल्टी पायो। इन्टर मिलानका फरवार्ड लाउटारो मार्टिनेजले सहज रूपमा पेनाल्टी गोल गर्दै अर्जेन्टिनालाई १–० को अग्रता दिलाए ।
दोस्रो हाफमा अर्जेन्टिना अझ आक्रामक देखियो। ५४ औँ मिनेटमा मार्टिनेजकै उत्कृष्ट ब्याकहील पासमा एट्लेटिको म्याड्रिडका जुलियानो सिमियोनेले गोल गर्दै अग्रता २–० मा पुर्याए ।
मार्टिनेज खेलभर निरन्तर खतरनाक देखिए भने जियोभानी लो सेल्सोको पहिलो हाफको उत्कृष्ट प्रहार क्रसबारमा लागेको थियो। दोस्रो हाफमा अर्जेन्टिनाले थप अवसर सिर्जना गरे पनि गोल संख्या बढाउन सकेन। उता, होन्डुरसले खेलभर खासै प्रभाव देखाउन सकेन र दोस्रो हाफमा मैदानको मध्य भागभन्दा अघि बढ्न कठिनाइ भोग्यो ।
लियोनेल मेस्सी चोटबाट पूर्ण रूपमा नफर्किएकाले बेन्चमै रहे। प्रशिक्षक लियोनेल स्कालोनीले उनलाई विश्वकप समूह चरणका खेलका लागि पूर्ण फिट बनाउन विश्राम दिएका हुन् । स्कालोनीले टोलीको प्रदर्शनबारे बोल्दै भने, “टोलीको पहिचान कायम रहनु सबैभन्दा महत्वपूर्ण कुरा हो ।”
अर्जेन्टिनाले अब आफ्नो अन्तिम मैत्रीपूर्ण खेल आइसल्यान्डसँग खेल्नेछ र त्यसपछि जुन १६ मा क्यान्सस सिटीमा अल्जेरियाविरुद्ध विश्वकप अभियान सुरु गर्नेछ । स्कालोनीले मेस्सीले अर्को खेलमा केही मिनेट खेल्न सक्ने संकेत पनि दिएका छन् ।
ब्राजिलले पनि आफ्नो तयारीलाई निरन्तरता दिँदै इजिप्टलाई २–१ ले पराजित गरेको छ । न्यूक्यासलका मिडफिल्डर ब्रुनो गुइमाराएसले सुरुमै गोल गरे भने रियल म्याड्रिडका युवा फरवार्ड एन्ड्रिकले दोस्रो गोल थपे। बार्सिलोनाका राफिन्हाले दुवै गोलमा असिस्ट गरेका थिए ।
इजिप्टका लागि जिकोले गोल गरे भने मोहम्मद सालाहले पहिलो हाफमा केही राम्रो अवसर सिर्जना गरे। तर ब्राजिलका र रोमाका राइट–ब्याक वेस्ली मांसपेशी चोटका कारण मैदान छोड्दा टोलीलाई धक्का लागेको छ, जसले उनको विश्वकप सहभागितामा शंका उत्पन्न गरेको छ ।
अन्य अन्तर्राष्ट्रिय मैत्रीपूर्ण खेलहरूमा इङ्ल्यान्डले न्युजिल्यान्डलाई १–० ले हरायो, जहाँ ह्यारी केनले निर्णायक हेडर गोल गरे । प्रशिक्षक थोमस टुचेलले २२ खेलाडीलाई मौका दिँदै सम्पूर्ण टिम परिवर्तन गरेका थिए ।
जर्मनीले संयुक्त राज्य अमेरिकालाई २–१ ले पराजित गर्दै लगातार नवौँ जित निकालेको छ। पोर्चुगलले चिलीलाई २–१ ले हरायो, जसमा दुवै टोलीका एक–एक खेलाडी रातो कार्ड पाए । स्कटल्याण्डले बोलिभियालाई ४–० ले हरायो भने बेल्जियमले ट्युनिसियालाई ५–० को फराकिलो अन्तरले पराजित गर्यो ।
अन्य खेलमा स्विट्जरल्यान्ड र अस्ट्रेलिया १–१ को बराबरीमा रोकिए भने बोस्निया र हर्जगोभिना तथा पानामाबीचको खेल पनि १–१ को बराबरीमा सकियो ।
प्रक्षेपण राष्ट्रिय दैनिकबाट साभार ।
