काठमाडौं । नेपाल भलिबल संघ (एनभीए) ले आर्थिक वर्ष २०८३/८४ का लागि राष्ट्रिय तथा अन्तर्राष्ट्रिय प्रतियोगिताहरू समेटिएको वार्षिक क्यालेन्डर सार्वजनिक गरेको छ ।
सोमबार काठमाडौंमा आयोजित विशेष कार्यक्रममा संघले आगामी एक वर्षका राष्ट्रिय प्रतियोगिता, अन्तर्राष्ट्रिय सहभागिता, प्रशिक्षण कार्यक्रम तथा नेपालमै आयोजना हुने अन्तर्राष्ट्रिय प्रतियोगिताको विस्तृत कार्यतालिका सार्वजनिक गरेको हो ।
सार्वजनिक क्यालेन्डरअनुसार नेपालले यस वर्ष केन्द्रीय एसियाली भलिबल संघ (काभा) अन्तर्गतका तीन महत्त्वपूर्ण अन्तर्राष्ट्रिय प्रतियोगिता आयोजना गर्नेछ । नेपालमा काभा महिला च्याम्पियन्स लिग, काभा पुरुष भलिबल च्याम्पियनसिप (विश्व वरीयता अंकसहित) तथा काभा पुरुष च्यालेन्ज कप आयोजना गरिनेछ । यी प्रतियोगिताले नेपाली भलिबलको अन्तर्राष्ट्रिय स्तरमा पहिचान विस्तार गर्नुका साथै खेलाडीलाई उच्चस्तरीय प्रतिस्पर्धाको अनुभव दिलाउने विश्वास संघले गरेको छ ।
संघले वार्षिक कार्यक्रमअन्तर्गत थ्री नेसन्स कप पनि आयोजना गर्ने योजना सार्वजनिक गरेको छ । दक्षिण एसियाली तथा केन्द्रीय एसियाली राष्ट्रहरूको सहभागिता रहने अपेक्षा गरिएको उक्त प्रतियोगिताले नेपाली टोलीको अन्तर्राष्ट्रिय तयारीलाई थप मजबुत बनाउने विश्वास गरिएको छ ।
काभा महिला च्याम्पियन्स लिग आगामी भदौ १६ देखि २२ गतेसम्म काठमाडौंमा आयोजना हुने तय भएको छ । नेपालले यसअघि पनि सन् २०२४ र २०२५ मा यो प्रतियोगिता सफलतापूर्वक आयोजना गरिसकेको छ । सन् २०२४ को संस्करणमा नेपाल उपविजेता बनेको थियो भने २०२५ मा चौथो स्थानमा सीमित भएको थियो । यसपटक घरेलु मैदानको फाइदा उठाउँदै उत्कृष्ट प्रदर्शन गर्ने लक्ष्य नेपाली टोलीको रहनेछ ।
अन्तर्राष्ट्रिय सहभागितातर्फ नेपालले जापानमा आयोजना हुने २०औँ एसियाली खेलकुदमा महिला राष्ट्रिय भलिबल टोली सहभागी गराउने कार्यक्रम पनि क्यालेन्डरमा समावेश गरेको छ । एसियाली खेलकुद महादेशकै प्रतिष्ठित प्रतियोगिता भएकाले नेपाली महिला टोलीका लागि आफ्नो क्षमता प्रदर्शन गर्ने महत्वपूर्ण अवसरका रूपमा हेरिएको छ ।
राष्ट्रिय प्रतियोगिताअन्तर्गत ३५औँ राष्ट्रिय पुरुष तथा २५औँ राष्ट्रिय महिला भलिबल प्रतियोगिता कर्णाली प्रदेशको सुर्खेतमा आयोजना हुनेछ । देशभरका उत्कृष्ट टोलीको सहभागिता रहने उक्त प्रतियोगितालाई नेपाली भलिबलको सबैभन्दा प्रतिष्ठित घरेलु प्रतियोगितामध्ये एक मानिन्छ ।
काठमाडौंमा १०औँ एनभीए महिला तथा पुरुष भलिबल च्याम्पियनसिप आयोजना गरिनेछ । यस्तै प्रधानमन्त्री कप एनभीए महिला तथा पुरुष भलिबल लिग पनि यसै आर्थिक वर्षमा सञ्चालन हुनेछ । यी प्रतियोगिताले राष्ट्रिय टोलीका लागि नयाँ खेलाडी उत्पादन तथा अनुभवी खेलाडीको प्रतिस्पर्धात्मक क्षमता कायम राख्न महत्वपूर्ण भूमिका खेल्ने अपेक्षा गरिएको छ ।
संघले सातौँ महिला तथा आठौँ पुरुष राष्ट्रिय बीच भलिबल प्रतियोगिता पनि सञ्चालन गर्ने भएको छ । पछिल्ला वर्षहरूमा बीच भलिबलप्रति आकर्षण बढ्दै गएकाले यस विधाको विकासलाई प्राथमिकतामा राखिएको संघले जनाएको छ ।
युवा खेलाडी उत्पादनलाई ध्यानमा राख्दै यू–१९ राष्ट्रिय भलिबल प्रतियोगिता तथा यू–१८ अन्तरविद्यालय भलिबल प्रतियोगिता पनि वार्षिक कार्यक्रमअन्तर्गत समावेश गरिएको छ । विद्यालय र उमेर समूहका प्रतियोगिताले भविष्यका राष्ट्रिय खेलाडी उत्पादनमा महत्वपूर्ण योगदान पुर्याउने विश्वास गरिएको छ ।
व्यावसायिक भलिबललाई थप सशक्त बनाउने उद्देश्यले एभरेस्ट महिला भलिबल लिग तथा नेपाल भलिबल लिग पनि यसै आर्थिक वर्षमा आयोजना गरिनेछ । फ्रेन्चाइज प्रणालीमा सञ्चालन हुने यी प्रतियोगिताले घरेलु खेलाडीलाई व्यावसायिक अवसर उपलब्ध गराउनुका साथै विदेशी खेलाडीसँग प्रतिस्पर्धा गर्ने वातावरण सिर्जना गर्ने अपेक्षा गरिएको छ ।
खेलाडीको क्षमता विकाससँगै प्राविधिक पक्षलाई पनि सुदृढ बनाउने लक्ष्यसहित राष्ट्रिय रेफ्री तथा प्रशिक्षक (कोच) कोर्स सञ्चालन गरिनेछ । साथै मैत्रीपूर्ण खेलहरू आयोजना गरी राष्ट्रिय टोलीको तयारीलाई थप प्रभावकारी बनाउने योजना पनि संघले सार्वजनिक गरेको छ ।
नेपाल भलिबल संघले सार्वजनिक गरेको वार्षिक क्यालेन्डरले राष्ट्रिय तथा अन्तर्राष्ट्रिय दुवै स्तरमा नेपाली भलिबललाई थप प्रतिस्पर्धी र व्यावसायिक बनाउने लक्ष्य लिएको देखिन्छ । घरेलु प्रतियोगिताको निरन्तरता, अन्तर्राष्ट्रिय प्रतियोगिताको आयोजना, उमेर समूहका प्रतियोगिता, फ्रेन्चाइज लिग तथा एसियाली खेलकुद सहभागिताले आगामी वर्ष नेपाली भलिबलका लागि निकै व्यस्त र महत्वपूर्ण रहने संकेत गरेको छ ।
प्रक्षेपण राष्ट्रिय दैनिकबाट साभार ।
