रुकुमपश्चिम । आईतबार बिहान रुकुम पश्चिमको सानीभेरी गाउँपालिका ६ मा भएको बोलेरो जीप
दुर्घटनामा मृत्यु भएका २ जना र घाईतेहरुको पहिचान खुलेको छ ।
सानीभेरी गाउँपालिका वडा नम्वर६ को कोटगाउँबाट पालिकाको केन्द्र सिम्लीतर्फ आउँदै गरेका लु १ च ६०२९ नम्वरको डबल क्याप बोलेरा जीप वडा नम्वर ६ को कार्यालय नजिकै दुली सिम्ली जोड्ने भित्रि सडकखण्डमा दुर्घटना हुँदा दुई जनाको घटनास्थलमै मृत्यु भएको प्रहरीले जनाएको छ ।
जिल्ला प्रहरी कार्यालयका प्रमुख प्रहरी नायब उपरीक्षक बेदबहादुर पौडेलका अनुसार मृत्यु हुनेमा त्रिवेणी गाउँपालिका वडा नम्वर ४ निवासी जीप चालक २७ वर्षीय सुन्दर खड्का र सानीभेरी गाउँपालिका वडा नम्वर ६ निवासी १६ वर्षीया प्रेमकला पुन रहेका छन् । मृतकहरुको शव जिल्ला अस्पताल सल्ले ल्याईएको छ । जीपमा चालकसहित १५ जना रहेको खुलेको छ ।
जीपमा सवार मध्य ४ जनाको अवस्था गम्भिर रहेको छ भने सात जनाको अवस्था मध्यम र एक जनाको अवस्था सामान्य रहेको छ । एक जना भने सकुशल रहेको प्रहरीले जनाएको छ । घाईते मध्य सानीभेरी गाउँपालिका ६ निवासी गाडीधनि ३८ वर्षीय बलबहादुर पुन, सोही ठाउँमा १५ वर्षीय पूर्णबहादुर जैसी, ५० वर्षीया कौशिला पुन मगर र १५ वर्षीया खिमला पुनलाई थप उपचारको लागि नेपाली सेनाको हेलिकप्टरमार्फत सुर्खेत पठाईएको छ ।
त्यसैगरी सोहि स्थानका २० वर्षीया अन्जना पुन, ५० वर्षीया बिर्मी खत्री, १५ वर्षीया बिबिशा पुन मगर, १५ वर्षीय बिशाल बिक, ९ बर्षिय शिशिर पुन, २० वर्षीय रिता पुन मगर, जाजरकोटको शिवालय गाउँपालिका निवासी १७ वर्षीया ज्ञानु पुन मगरलाई उपचारको लागि चौरजहारी अस्पतालमा लिईएको छ । यी घाईतेहरु मध्य अन्जना, बिशाल र ज्ञानुको अवस्था गम्भिर रहेको छ । जीपमा सवार सानीभेरी गाउँपालिका ६ का १० वर्षीय रमेश कुसारीको भने अवस्था सामान्य रहेको छ । उनको सानीेभेरी गाउँपालिका अस्पतालमा उपचार भईरहेको छ । सोही स्थानका नविन देवकोटालाई भने सामान्य उपचारपछि डिस्चार्ज गरिएको छ ।
दुर्घटनाको सूचना लगत्तै जिल्ला प्रहरी कार्यालयबाट प्रहरी नायब उपरीक्षक बेदबहादुर पौडेल र सशस्त्र प्रहरी बल नेपाल ४७ नम्वर गुल्मबाट प्रहरी सहायक निरीक्षक मधु गौतमको कमाण्डमा प्रहरी टोली घटनास्थल पुगेको थियो । प्रहरी र स्थानीयले घाईतेहरुको उद्धार गरेर सानीभेरी गाउँपालिका अस्पताल पुर्याएका थिए । प्रहरीले क्षमता भन्दा बढी यात्रु रहेको र अप्ठ्यारो मोडको कारण दुर्घटना भएको अनुमान गरेको छ । घटनाको अनुसन्धान सुरु भएको बताईएको छ ।
