काठमाडौँ । नेपाली कांग्रेसको पूर्वसभापति शेरबहादुर देउवा समूहले छुट्टै महाधिवेशन गर्ने तयारीलाई तीव्रता दिँदै क्रियाशील सदस्यताको विवरण केन्द्रीय निर्वाचन समितिलाई हस्तान्तरण गरेको छ ।
१५औँ महाधिवेशनका लागि देउवा समूहले गठन गरेको सदस्यता व्यवस्थापन केन्द्रीय समितिले शनिबार महाराजगञ्जको चुनदेवीस्थित सम्पर्क कार्यालयमा पत्रकार सम्मेलन आयोजना गरी क्रियाशील सदस्यताको विवरण निर्वाचन समितिलाई बुझाएको हो ।
सदस्यता व्यवस्थापन समितिका संयोजक किरणराज शर्मा पौडेलले केन्द्रीय निर्वाचन समितिका संयोजक एकराज पोख्रेललाई सदस्यताको विवरण हस्तान्तरण गरेका हुन् । देउवा समूहले महाधिवेशनका लागि छुट्टै संगठनात्मक संरचना र कार्यतालिका बनाएर तयारी अघि बढाइरहेको छ । समितिका अनुसार नवीकरण गरिएका तथा नयाँ गरी कुल ७ लाख ८३ हजार ८३६ क्रियाशील सदस्यको विवरण तयार गरिएको छ । यसमध्ये ५ लाख ७३ हजार २६९ जना पुराना क्रियाशील सदस्यले सदस्यता नवीकरण गरेका छन् भने २ लाख १० हजार ६६७ जना नयाँ क्रियाशील सदस्य थपिएका छन् ।
समितिका संयोजक पौडेलका अनुसार शनिबारदेखि नयाँ क्रियाशील सदस्यता अनलाइनमार्फत वितरण गर्ने व्यवस्था मिलाइएको छ । सदस्यता वितरणलाई व्यवस्थित बनाउन देउवा समूहले छुट्टै वेबसाइटसमेत सञ्चालनमा ल्याएको जनाएको छ । नेपाली कांग्रेसभित्र १५औँ महाधिवेशनको मिति र प्रक्रिया अघि बढाउने विषयमा दुई धार देखिएपछि देउवा समूहले समानान्तर रूपमा महाधिवेशनको तयारी गरिरहेको हो । देउवा समूहले असोज १५ गतेदेखि देशभरका वडामा अधिवेशन सुरु गर्ने कार्यतालिका बनाएको छ । त्यसपछि पालिका, क्षेत्रीय, जिल्ला र प्रदेश तहका अधिवेशन गर्दै मंसिर २१ देखि २३ गतेसम्म केन्द्रीय महाधिवेशन गर्ने तयारी गरेको छ ।
यसका लागि पूर्वमहामन्त्री डा. शशांक कोइरालाको संयोजकत्वमा १५औँ केन्द्रीय महाधिवेशन तयारी समिति गठन गरिएको छ । समितिले विभिन्न जिल्लामा केन्द्रीय प्रतिनिधिसमेत खटाइसकेको छ । देउवा समूहले देशभरका संगठनात्मक गतिविधिलाई अघि बढाउँदै महाधिवेशनको आधार तयार पार्ने प्रयास गरिरहेको छ । अर्कोतर्फ, नेपाली कांग्रेसको केन्द्रीय निर्वाचन समितिले असोज १६ देखि १९ गतेसम्म १५औँ केन्द्रीय महाधिवेशन गर्ने गरी यसअघि नै निर्वाचन कार्यतालिका सार्वजनिक गरेको छ । उक्त कार्यतालिकाअनुसार विभिन्न तहका अधिवेशनको प्रक्रिया अघि बढाइएको कांग्रेसको आधिकारिक वेबसाइटमा उल्लेख छ ।
यही कारण कांग्रेसभित्र महाधिवेशनको प्रक्रिया र सदस्यताको विषयमा दुई पक्षबीच मतभेद कायम छ । देउवा समूहले आफ्नो छुट्टै कार्यतालिकाअनुसार अधिवेशन अघि बढाउने तयारी गरिरहेको छ भने अर्को पक्षले असोज १६ देखि १९ गतेसम्म केन्द्रीय महाधिवेशन गर्ने कार्यतालिकाअनुसार संगठनात्मक प्रक्रिया अघि बढाएको छ । क्रियाशील सदस्यता महाधिवेशनमा सहभागी हुने प्रतिनिधि चयनको आधार भएकाले देउवा समूहले सदस्यता व्यवस्थापनलाई प्राथमिकतामा राखेको देखिन्छ । सदस्यता विवरण हस्तान्तरण र नयाँ सदस्यता वितरण सुरु भएसँगै उसले समानान्तर महाधिवेशनको तयारीलाई थप औपचारिक रूपमा अघि बढाएको छ ।
प्रक्षेपण राष्ट्रिय दैनिकबाट साभार ।
