काठमाडौं । राप्रपा नेपालका अध्यक्ष कमल थापाले नेपालको पहिचानको रूपमा रहेको राजसंस्था र हिन्दु राष्ट्रलाई विदेशीको इशारामा एम्बुसमा पारिएको बताएका छन् ।
नेपाली जनताको अभिमतबिना विदेशी शक्तिको प्रभाव र प्रायोजनमा जबर्जस्ती लादिएको एजेन्डाले मुलुकको हित गर्न नसकिने उनले दाबी गरेका छन् ।
संघीयता नेपाली जनताले बुझ्दै नबुझेको भन्दै संघीयताको नाममा मुलुकले सेतो हात्ती पाल्न नसक्ने थापाले स्पष्ट पारे।
२०६२/०६३ को परिवर्तनको समयमा आफूले धेरै नजिकबाट विदेशी दबाब र प्रभावलाई देखेको भोगेको थापाको दाबी थियो ।
मुलुकमा अहिले राजनितिको नाममा सिद्धान्तच्युत , भ्रष्ट , नौटङ्गी, ठगहरु हाबी भएको भन्दै थापाले मुलुकलाई स्वाधिन र समृद्ध बनाउने हो भने राप्रपा नेपालले लिएको विचारधाराबाट मुलुकलाई अघि बढाउनु पर्नेमा उनको जोड थियो ।
मुलुकलाई बचाउन र बनाउन अब सम्वर्द्धनवादको मार्ग बाहेक अरु विकल्प नभएको भन्दै थापाले राप्रपा नेपाललाई मुलुकको बैकल्पिक राष्ट्रवादी प्रजातान्त्रिक शक्ति बनाउने अभियानमा आफू अझै उच्च मनोबल सहित कृयाशील भएको उनको धारणा थियो ।
आज आयोजित पार्टी प्रवेश कार्यक्रममा डा. बालकृष्ण दाहाल, डा.सुदर्शन सुबेदी, अर्थबिद प्रकाश थापा, कृषी विज्ञ अश्विन आचार्य, बिष्णु तिवारी लगायत विभिन्न महत्त्वपूर्ण व्यक्तिहरुलाई अध्यक्ष थापाले पार्टीमा स्वागत गरेका थिए ।
